काठमाण्डाै०५भदाै०७५/ एप्पलको शोरुममा बिक्रीका लागि राखिएको आइप्याड पड्कीएपछि कम्पनीका तीन कर्मचारी घाइते भएको बताइएको छ । नेदरल्यान्डको एम्स्टरडर्मस्थित एक शोरुममा आइप्याडको ब्याट्री पड्कीँदा सो दुर्घटना भएको हो । ब्याट्री पड्कीएपछि त्यसबाट निस्किएको हानिकारक रासायनिक धुँवाका कारण कर्मचारीलाई सास लिनमा समस्या देखिएपछि उपचारका लागि लगिएको बताइएको छ ।
सोमबारको यो घटनापछि तत्कालै शोरुमलाई खाली गरि बन्द गरिएको थियो । ब्याट्री पड्कीनासाथै कर्मचारीहरु आगो निभाउन सफल भएपनि त्यसबाट बाहिर निस्किरहेको हानिकारक धुँवालाई रोक्न चाहिँ असमर्थ भएका थिए । त्यसैक्रममा घटनास्थल पुगेको दमकलले शोरुमलाई खाली गराइ हावामा कुनै खराबी नभएको सुनिश्चित गरेको थियो । जसपछि शोरुम फेरि खुलाइएको हो । यसबारे पहिले एम्स्टरडर्मको फायर ब्रिगेडले ट्वीट गर्दै घाइते भएका कर्मचारीको खबर दिएको थियो ।
एप्पलको न्युज साइट ‘नाइट टु फाइभ म्याक’ ले बताए अनुसार पछिल्लो समय एप्पलले यो भन्दा गम्भीर दुर्घटनाहरुको सामना गर्नु परिरहेको छ । वास्तवमा कम्पनीले पुराना आइफोनको ब्याट्री बदल्ने अभियान सुरु गरेदेखि नै यस्ता घटनामा वृद्धि हुँदै गइरहेको बताइएको छ जसपछि कम्पनीले सबैतिरबाट नकारात्मक प्रतिक्रिया पाएको हो । एप्पलले पुराना आइफोनहरुको ब्याट्रीलाई सुस्त बनाइदिने भनेपछि त्यसै समय कम्पनी बारम्बार आलोचित हुनु परेको थियो । तर एक ग्राहकले कम्पनीको यस्तो निर्णय विरुद्ध कानूनी कारबाही अघि बढाउन उजुरी हालेपछि एप्पलले सबैलाई भारी छुटमा वा निःशुल्क पुराना ब्याट्रीहरु बदलिदिने घोषणा गरेको हो ।बीबीसी
