बेँसीशहर, लमजुङ, १ माघ ०७४/ पूर्वप्रधानमन्त्री झलनाथ खनालले फागुनमा वाम नेतृत्वको सरकार गठन हुने बताउनुभएको छ ।
लमजुङ सदरमुकाम बेँसीशहरमा आयोजित घले ल्होसार कार्यक्रममा उहाँले भन्नुभयो– “फागुनको तेस्रो साताभित्र नयाँ सरकार गठन हुन्छ ।
नेकपा (एमाले) वरिष्ठ नेतासमेत रहनुभएका खनालले संविधानकै प्रावधानका कारण नयाँ सरकार गठनमा ढिलाइ भएको उल्लेख गर्दै सरकार गठनअघि एमाले र नेकपा (माओवादी केन्द्र) बीच एकता हुने बताउनुभयो ।
“हामीले बनाएको संविधानले नै सरकार गठनमा ढिलाइ भएको छ”– उहाँले भन्नुभयो, “संविधानमै रहेर फागुनको दोस्रो वा तेस्रो साताभित्र वाम नेतृत्वको सरकार बन्छ ।”
नेता खनालले लोकतन्त्र अझै कमजोर र कलिलो भएको भन्दै अब बन्ने सरकारले लोकतन्त्रलाई संस्थागत गर्न पहिलो प्राथमिकता दिने बताउनुभयो ।
हामीले लामो संघर्ष गरेर ल्याएको लोकतन्त्र अझै कलिलो छ”– उहाँले भन्नुभयो, “अब बन्ने सरकारले सबैभन्दा पहिला लोकतन्त्रलाई बलियो र संस्थागत गर्नेछ ।”
नेता खनालले संविधानले सबै जातिको मौलिक अधिकार सुनिश्चित गरेको पनि बताउनुभयो ।
लिःल घले समाजका केन्द्रीय अध्यक्ष दिनेश घलेको अध्यक्षतामा भएको सो कार्यक्रममा मुलुकभरीबाट घले समुदायको सहभागिता थियो ।
